परदेशातून पेमेंट घेणे होणार अधिक सोपे

• जिओ पेमेंट सोल्यूशन्सने सुरू केली क्रॉस-बॉर्डर सेवा
कोल्हापूर :
परदेशात वस्तू किंवा सेवा विकणाऱ्या भारतीय व्यावसायिकांसाठी आता पेमेंट स्वीकारणे अधिक सोपे होणार आहे. जिओ फायनान्शियल सर्व्हिसेसची कंपनी जिओ पेमेंट सोल्यूशन्स लिमिटेड (जेपीएसएल) ने क्रॉस-बॉर्डर पेमेंट सेवा सुरू केली आहे. या सेवेद्वारे भारतीय एक्सपोर्टर्सना जगभरातील ग्राहकांकडून व्हर्च्युअल अकाउंट, इंटरनॅशनल कार्ड आणि स्थानिक पेमेंट नेटवर्कच्या माध्यमातून पेमेंट स्वीकारता येणार आहे. ‘जेपीएसएल’ला भारतीय रिझर्व्ह बँकेकडून क्रॉस-बॉर्डर पेमेंट अ‍ॅग्रीगेटर म्हणून मंजुरी मिळाली आहे. या मंजुरीअंतर्गत निर्यात आणि आयात अशा दोन्ही प्रकारच्या क्रॉस-बॉर्डर व्यवहारांचा समावेश आहे. मात्र, सध्या सुरू करण्यात आलेल्या या सेवेचा मुख्य भर परदेशातून पेमेंट स्वीकारण्याची प्रक्रिया सुलभ करण्यावर आहे.
या सेवेचा लाभ ऑनलाइन विक्रेते, डिजिटल व्यवसाय, फ्रीलान्सर्स, क्रिएटर्स तसेच सॉफ्टवेअर सेवा पुरवणाऱ्या कंपन्यांनाही घेता येणार आहे. सध्या परदेशातील ग्राहकांकडून पेमेंट स्वीकारताना विविध चलने, अनेक भागीदार, कागदपत्रांची पूर्तता तसेच पेमेंटचे मिलान यांसारख्या अनेक अडचणींचा सामना करावा लागतो. कंपनीच्या म्हणण्यानुसार, नवीन प्लॅटफॉर्ममुळे या प्रक्रिया अधिक सुलभ होतील आणि व्यावसायिकांना परदेशातील ग्राहकांकडून त्यांच्या स्थानिक पेमेंट पद्धतींच्या माध्यमातून थेट पेमेंट स्वीकारता येईल.
‘जेपीएसएल’च्या माहितीनुसार, तिची क्रॉस-बॉर्डर पेमेंट सेवा भारताच्या सुमारे ५० टक्के निर्यात क्षेत्राला व्यापते. अमेरिका, ब्रिटन, युरोप, यूएई, सिंगापूर, मलेशिया आणि ऑस्ट्रेलिया यांसारख्या बाजारपेठांमध्ये भारतीय व्यावसायिकांना ग्राहकाच्या स्थानिक चलनात किंमत दर्शवता येणार असून त्याच चलनात पेमेंटही स्वीकारता येणार आहे. आगामी काही महिन्यांत लॅटिन अमेरिका, दक्षिण-पूर्व आशिया आणि मध्य-पूर्वेतील बाजारपेठांसाठीही नवीन स्थानिक पेमेंट पद्धती जोडण्याची कंपनीची योजना आहे.
कंपनीच्या म्हणण्यानुसार, व्यावसायिकांना व्यवहार पूर्ण झाल्यानंतर दोन कार्यदिवसांच्या आत पेमेंटचे सेटलमेंट मिळू शकेल. तसेच, प्राप्त झालेल्या रकमेतील कोणताही भाग रोखून ठेवला जाणार नाही. परदेशातून होणाऱ्या पेमेंटशी संबंधित आवश्यक कागदपत्रेही त्याच कार्यदिवशी उपलब्ध करून देण्याची व्यवस्था करण्यात आली आहे. या सेवेसाठी जेपीएसएलने सिटी (Citi) सोबत भागीदारी केली आहे.
——————————————————-