जिओ आयपीओची प्रतीक्षा संपली; कंपनी आणणार २७ कोटी समभागांपर्यंतचा फ्रेश इश्यू

कोल्हापूर :
देशातील सर्वाधिक चर्चेत असलेल्या आयपीओंपैकी एक मानल्या जाणाऱ्या जिओ प्लॅटफॉर्म्सच्या सार्वजनिक समभाग विक्रीची औपचारिक प्रक्रिया सुरू झाली आहे. रिलायन्स इंडस्ट्रीजने स्टॉक एक्स्चेंजना दिलेल्या माहितीनुसार, जिओ प्लॅटफॉर्म्स लिमिटेडच्या संचालक मंडळाने २७ कोटी इक्विटी समभागांपर्यंतच्या फ्रेश इश्यूला मंजुरी दिली आहे. या समभागांचे दर्शनी मूल्य प्रति समभाग १० रुपये असेल. इश्यूची किंमत बुक बिल्डिंग प्रक्रियेद्वारे निश्चित करण्यात येणार आहे.
रिलायन्स इंडस्ट्रीज लिमिटेडच्या ४९ व्या वार्षिक सर्वसाधारण सभेत (एजीएम) अध्यक्ष आणि व्यवस्थापकीय संचालक मुकेश डी. अंबानी यांनी सांगितले की, जिओ प्लॅटफॉर्म्सच्या संचालक मंडळाने ड्राफ्ट रेड हेरिंग प्रॉस्पेक्टसला मंजुरी दिली असून तो आज सेबीकडे दाखल करण्यात येणार आहे. कंपनीने बीएसई आणि एनएसईला दिलेल्या माहितीतही स्पष्ट केले आहे की, हा आयपीओ आवश्यक नियामक मंजुरींच्या अधीन असेल.
एजीएममध्ये बोलताना मुकेश अंबानी यांनी हा क्षण रिलायन्स परिवार आणि त्याच्या लाखो भागधारकांसाठी भावनिक असल्याचे सांगितले. त्यांनी म्हटले की, रिलायन्स आणि तिच्या भागधारकांमधील नाते हे अभिमान, विश्वास, परस्पर आदर आणि सामायिक प्रगतीवर आधारित असलेले एक दृढ व पवित्र बंधन आहे.
मुकेश अंबानी म्हणाले की, जिओची प्रस्तावित सूचीबद्धता (लिस्टिंग) जगाला हे दाखवून देईल की भारत जागतिक दर्जा, जागतिक क्षमता आणि जागतिक मूल्य असलेल्या तंत्रज्ञान कंपन्या उभारू शकतो. मी आपल्याला आणि संभाव्य नव्या गुंतवणूकदारांना आश्वस्त करू इच्छितो की जिओचे भविष्य आणखी उज्ज्वल आहे.
ते पुढे म्हणाले की, यंदाच्या वर्षातील मूल्यनिर्मितीच्या दृष्टीने सर्वात महत्त्वाचा टप्पा म्हणजे निकट भविष्यात होणारा जिओचा आयपीओ होय. त्यांच्या मते, यामुळे रिलायन्सच्या विद्यमान भागधारकांसाठी मोठ्या प्रमाणात मूल्यनिर्मिती होईल तसेच नव्या गुंतवणूकदारांसाठी आकर्षक गुंतवणुकीची संधी उपलब्ध होईल.
गेल्या दहा वर्षांत जिओने भारताच्या डिजिटल परिवर्तनात निर्णायक भूमिका बजावली आहे. आपल्या प्रवासाच्या सुरुवातीच्या काळात व्हॉइस सेवा महाग, डेटा खर्चिक आणि इंटरनेटचा वेग मर्यादित असल्याचे सांगत मुकेश अंबानी म्हणाले की, जिओने व्हॉइस सेवा मोफत केली आणि उच्च-गती डेटा सर्वसामान्यांसाठी परवडणारा बनवला.
——————————————————-