६५व्या राज्य हौशी नाट्य स्पर्धेस आजपासून प्रारंभ

कोल्हापूर :
६५ व्या महाराष्ट्र राज्य हौशी मराठी नाट्य स्पर्धा, २०२६-२७ च्या प्राथमिक फेरीस सोमवार (दि.१६) पासून संगीतसूर्य केशवराव भोसले नाट्यगृहात प्रारंभ होत आहे.
महाराष्ट्र शासनाच्या सांस्कृतिक कार्य संचालनालयामार्फत ६५ व्या महाराष्ट्र राज्य हौशी मराठी नाट्य स्पर्धेचे सायंकाळी ७ वाजता उद्घाटन होणार असून या स्पर्धेत एकूण २१ दर्जेदार व आशय संपन्न नाटकांचे सादरीकरण रसिक प्रेक्षकांसाठी करण्यात येणार आहे. ही स्पर्धा संगीतसूर्य केशवराव भोसले नाट्यगृहात येत्या ९ डिसेंबरपर्यंत नाट्यप्रेमींसाठी नाममात्र दरात खुली राहणार आहे. राज्यातील विविध २४ जिल्हास्तरीय शहरातील केंद्रांवर या स्पर्धेचा १६ नोव्हेंबर रोजी शुभारंभ करण्यात येणार आहे.
सांस्कृतिक कार्य संचालनालयामार्फत मराठी रंगभूमी समृध्द करण्याकरीता विविध उपक्रम राबविण्यात येत आहेत. त्याचाच एक भाग म्हणून आतापर्यंत महाराष्ट्र राज्य नाट्य स्पर्धेची गौरवसंपन्न ६५ वर्षे अविरत वाटचाल चालू आहे. या वाटचालीतून देशाला,राज्याला अनेक नामवंत नाटककार, अभिनेते, तंत्रज्ञ व दिग्दर्शक मिळाले. त्यांनी आपल्या कारकिर्दीत अनेक नवनवीन अभिनव प्रयोग करुन मराठी रंगभूमीस समृध्दतेचा तसेच वैश्विकस्तराचा दर्जा प्राप्त करुन दिला. या राज्य नाट्य हौशी स्पर्धेतील अनेक होतकरु दिग्दर्शकांना तसेच कलावंताना प्रोत्साहन देण्यासाठी जिल्ह्यातील नाट्यप्रेमींनी मोठ्या संख्येने उपस्थिती दर्शवावी, असे आवाहन संयोजकांच्यावतीने करण्यात आले आहे.