३,५०० शो आणि २५ लाख प्रेक्षक

• भारतीय कलेपासून जागतिक शोपर्यंत NMACC ठरले मोठे सांस्कृतिक व्यासपीठ
• तीन वर्षांत १०,५०० हून अधिक कलाकारांचा सहभाग
कोल्हापूर :
भारतीय कला आणि जगभरातील नामांकित सांस्कृतिक कार्यक्रमांना एकाच व्यासपीठावर आणण्याच्या प्रयत्नांना गेल्या तीन वर्षांत मोठे यश मिळाले आहे. मार्च २०२३ मध्ये सुरू झालेल्या नीता मुकेश अंबानी कल्चरल सेंटर अर्थात एनएमएसीसी मध्ये आतापर्यंत ३,५०० हून अधिक शो सादर झाले आहेत. या काळात सुमारे २५ लाख प्रेक्षकांनी येथे भेट दिली असून, १५ हून अधिक भाषांमध्ये १०,५०० पेक्षा अधिक कलाकारांनी आपली कला सादर केली आहे.
एनएमएसीसीच्या व्यासपीठावर भारतीय कथांना भव्य निर्मिती आणि आधुनिक तंत्रज्ञानाची जोड देत सादर करण्यात आले आहे. मुघल-ए-आझम: द म्युझिकल, राजाधिराज: लव्ह. लाइफ. लीला आणि एनएमएसीसीची स्वतःची निर्मिती असलेले द ग्रेट इंडियन म्युझिकल: सिव्हिलायझेशन टू नेशन ही त्याची ठळक उदाहरणे आहेत. त्याचवेळी, स्टुडिओ थिएटर आणि द क्यूब येथे हिंदी, गुजराती, मराठी आणि बंगालीसह विविध भाषांमध्ये थिएटर, संगीत, कॉमेडी आणि नृत्याचे छोटे तसेच प्रयोगशील कार्यक्रमही सातत्याने सादर करण्यात आले आहेत.
दुसरीकडे, भारतीय प्रेक्षकांना जगातील नामांकित सांस्कृतिक व्यासपीठांवरील गाजलेल्या कलाकृती आणि सादरीकरणे मुंबईतच अनुभवण्याची संधी मिळाली. द साउंड ऑफ म्युझिक, वेस्ट साइड स्टोरी, MAMMA MIA!, द फॅंटम ऑफ द ओपेरा आणि Wicked यांसारखे आंतरराष्ट्रीय शो NMACCमध्ये सादर झाले. NMACCच्या संस्थापक नीता अंबानी यांनी सुरुवातीपासूनच मांडलेली संकल्पना यामागे होती — “भारताचे सर्वोत्कृष्ट जगाला दाखवणे आणि जगातील सर्वोत्कृष्ट भारतात आणणे.”
या व्यापक सांस्कृतिक उपक्रमामागे एनएमएसीसीची अत्याधुनिक पायाभूत सुविधा देखील महत्त्वाची भूमिका बजावते. एनएमएसीसीमध्ये २,००० आसनांचे ग्रँड थिएटर, १९८ आसनांचे स्टुडिओ थिएटर, ८० आसनांचे द क्यूब आणि चार मजली आर्ट हाऊस आहे. त्यामुळे भव्य संगीत नाटक आणि थिएटरपासून छोट्या प्रयोगशील सादरीकरणांपर्यंत तसेच व्हिज्युअल आर्टपर्यंत विविध कलाप्रकारांसाठी वर्षभर वापरता येतील अशी स्वतंत्र आणि सुसज्ज व्यासपीठे येथे उपलब्ध आहेत.
येथे कला केवळ थिएटर किंवा गॅलरीच्या भिंतींपुरती मर्यादित नाही. सेंटरच्या सार्वजनिक परिसरात ५६ फूट उंचीचे कमल कुंज, घुंगरूंपासून साकारण्यात आलेली मुंबईची स्कायलाइन आणि जपानी कलाकार यायोई कुसामा यांच्या ‘Clouds’ यांसारख्या कलाकृतीही पाहायला मिळतात. यासोबतच, रिलायन्स फाउंडेशनचा स्वदेश भारतीय कारागिरी आणि पारंपरिक हस्तकलेला व्यासपीठ उपलब्ध करून देतो. त्यामुळे आधुनिक आणि जागतिक कलेसोबत भारतीय हस्तकलेलाही येथे विशेष स्थान मिळते.
एनएमएसीसीची व्याप्ती आता मुंबईबाहेरही विस्तारत आहे. ६१व्या व्हेनिस बिएनालेतील इंडिया पॅव्हिलियनच्या सादरीकरणातील एनएमएसीसीचा सहभाग हा भारतीय कलेला जागतिक व्यासपीठावर नेण्याच्या याच प्रयत्नांचा एक भाग आहे. चौथ्या वर्षात द ग्रेट इंडियन म्युझिकलचे पुनरागमन, Chicago तसेच ऑस्कर-नामांकित संगीतकार मॅक्स रिक्टर यांचे भारतातील पहिले सादरीकरणही प्रस्तावित आहे.
गेल्या तीन वर्षांतील हे आकडे केवळ कार्यक्रमांची संख्या दर्शवत नाहीत. ते भारतात कला आणि संस्कृतीसाठी एका अशा स्थायी व्यासपीठाची निर्मिती झाल्याचेही अधोरेखित करतात, जिथे भारतीय परंपरा, समकालीन कला आणि जगभरातील भव्य सांस्कृतिक सादरीकरणांना एकाच सांस्कृतिक छताखाली स्थान मिळत आहे.
——————————————————-