रिलायन्स फाउंडेशनकडून महिलांच्या डिजिटल सक्षमीकरणासाठी ₹२०० कोटींची नवी मोहीम सुरू

कोल्हापूर :
रिलायन्स फाउंडेशन आणि गेट्स फाउंडेशन यांनी महिलांचा डिजिटल सहभाग वाढविण्याच्या उद्देशाने ‘शीकनेक्ट्स डिजिटल ॲक्सेलरेटर’ या उपक्रमाची घोषणा केली आहे. ₹२०० कोटींच्या या उपक्रमाद्वारे भारत आणि उप-सहारा आफ्रिका भागातील महिला व मुलींना डिजिटल तंत्रज्ञानाची उपलब्धता आणि वापर वाढविण्यावर भर दिला जाणार आहे.
पुढील तीन वर्षांत हा कार्यक्रम स्थानिक पातळीवर प्रभावी ठरलेल्या डिजिटल उपायांची ओळख करून त्यांना व्यापक स्तरावर पोहोचविण्याचे काम करणार आहे, जे महिलांच्या जीवनमान आणि उपजीविकेत सकारात्मक बदल घडवू शकतील.
रिलायन्स फाउंडेशन भारतात या उपक्रमांतर्गत आधीच प्रभावी ठरलेल्या डिजिटल उपायांना पुढे नेणार असून, गेट्स फाउंडेशनच्या सहकार्याने भारत आणि उप-सहारा आफ्रिका यांच्यात अनुभव व ज्ञानाची देवाणघेवाण करण्यावरही भर दिला जाईल.
या प्रसंगी रिलायन्स फाउंडेशनच्या चीफ – महिला सक्षमीकरण, एन. दीप्ती रेड्डी यांनी सांगितले की, महिलांना डिजिटल जगात पूर्ण सहभागासाठी आवश्यक साधने आणि आत्मविश्वास प्रदान करणे अत्यंत गरजेचे आहे. त्यांच्या मते, हा उपक्रम महिलांची डिजिटल पोहोच वाढवून त्यांना अधिक सक्षम बनविण्यास मदत करेल.
गेट्स फाउंडेशनच्या डेप्युटी डायरेक्टर जेंडर इक्वॅलिटी, साची भल्ला यांनी सांगितले की, ग्लोबल साउथमधील अनेक देशांमध्ये महिलांना अजूनही डिजिटल तंत्रज्ञानाच्या उपलब्धतेत विविध अडचणींचा सामना करावा लागतो. हा उपक्रम स्थानिक गरजांनुसार तयार केलेल्या उपायांना चालना देईल.
——————————————————-