बाजार समित्यांनी पायाभूत सुविधांवर भर देण्याची गरज : डॉ. सुभाष घुले

कोल्हापूर :
बाजार समितीमध्ये शेतकरी केंद्रस्थानी ठेवून जिल्ह्यातील सर्व बाजार समित्यांनी शेतकऱ्यांना उपयुक्त ठरतील अशा सर्व पायाभूत सुविधा उपलब्ध करण्यावर भर द्यावा, बाजार समित्यांचे उत्पन्न वाढवण्याबाबत प्रयत्न करावेत, प्रत्येक बाजार समितीमध्ये ई वाचनालय सुरू करावे जेणेकरून शेतकऱ्यांना, व्यापाऱ्यांना त्याचा फायदा होईल, असे प्रतिपादन कोल्हापूर पणन विभागीय कार्यालयाचे उप सरव्यवस्थापक डॉ. घुले यांनी सूचित केले.
महाराष्ट्र राज्य कृषी पणन मंडळ, पुणे व राष्ट्रीय सुगी पश्चात तंत्रज्ञान संस्था, तळेगाव दाभाडे यांच्या संयुक्त विद्यमाने कोल्हापूर, रत्नागिरी, सिंधुदुर्ग जिल्ह्यातील सहा बाजार समित्यांचे सभापती, उपसभापती, संचालक व सचिव यांच्यासाठी हॅाटेल द फर्न, कोल्हापूर येथे पणन विषयक एकदिवसीय कार्यशाळेचे आयोजन करण्यात आले होते.
कार्यशाळेचे उदघाटन राजर्षी छत्रपती शाहू महाराज यांच्या पुतळ्यास सर्व बाजार समिती सभापती, डॉ. सुभाष घुले, तात्यासाहेब मुरुडकर व सहकारी अधिकारी जिल्हा उपनिबंधक कार्यालय यांच्या हस्ते पुष्पांजली अर्पण करुन करण्यात आले. डॉ. घुले यांनी आयोजित कार्यशाळेची प्रस्तावना करुन पणन मंडळाच्या विविध योजनांबाबत मार्गदर्शन केले.
यावेळी तुळशीदास रावराणे सभापती सिंधुदुर्ग, सुरेश सावंत सभापती रत्नागिरी, सुरेश पाटील सभापती वडगाव पेठ, प्रकाश देसाई सभापती कोल्हापूर, रामदास पाटील सभापती गडहिंग्लज, अण्णा पानदारे सभापती जयसिंगपूर, सूर्यकांत पाटील, नामदेव परीट, उपसंचालक कृषी, तात्यासाहेब मुरूडकर सहकारी अधिकारी, जिल्हा उपनिबंधक कार्यालय कोल्हापूर, अच्चुत सुरवसे, डीएमआय, पणन मंडळाचे अधिकारी यतीन गुंडेकर, शेखर कोंडे, अनिल जाधव, किरण जाधव, ओंकार माने, नवनाथ मोरे व कोल्हापूर, रत्नागिरी व सिंधुदुर्ग जिल्ह्यातील सर्व बाजार समितीचे पदाधिकारी, सचिव उपस्थित होते.
श्री. परीट यांनी बाजार समितीच्या कार्यक्षेत्रामध्ये येणारी कृषी उत्पादने व त्यावरील नियमनाबाबत उपस्थितांना मार्गदर्शन केले. केंद्र शासनाच्या डीएमआयचे अधिकारी श्री. सुरवसे यांनी डीएमआयच्या बाजार समिती व शेतकरी यांच्यासाठी असलेल्या विविध योजनांची माहिती दिली.श्री. कोंडे यांनी उपस्थितांचे आभार मानले.