माजी आ. कै. दिनकररावजी यादव जिल्हास्तरीय क्रीडा पुरस्कार सौरभ इंगळे यांना जाहीर

कोल्हापूर :
शिरोळ येथील शब्दगंध साहित्य परिषदेच्या वतीने माजी आमदार, दलितमित्र भाई कै. दिनकररावजी यादव जिल्हास्तरीय क्रीडा पुरस्कार शिरोळचे राष्ट्रीय कबड्डी खेळाडू सौरभ बजरंग इंगळे यांना जाहीर झाला आहे. १ फेब्रुवारी रोजी हा पुरस्कार प्रदान समारंभ श्री दत्त साखर कारखाना कार्यस्थळावर होणार असल्याची माहिती शब्दगंध साहित्य परिषदेचे अध्यक्ष सुनील इनामदार व उपाध्यक्ष डॉ. दगडू माने यांनी दिली.
दि. १ फेब्रुवारी रोजी माजी आमदार स्वर्गीय दिनकररावजी यादव यांच्या पुण्यतिथीनिमित्त एक दिवशीय साहित्य संमेलन होत आहे. ख्यातनाम साहित्यिक विठ्ठल वाघ, भीमराव धुळूबुळू, प्रसिद्ध धन्वंतरी अनिल मडके यांच्यासह मान्यवरांच्या उपस्थितीत राष्ट्रीय कबड्डी खेळाडू सौरभ इंगळे यांना पुरस्कार प्रदान करण्यात येणार आहे. कोल्हापुरी फेटा, सन्मानचिन्ह, सन्मानपत्र व स्पोर्ट्स किट असे पुरस्काराचे स्वरूप आहे.
सौरभ बजरंग इंगळे हा बाल शिवाजी मंडळ शिरोळचा राष्ट्रीय खेळाडू असून त्याचे शिक्षण बीएससी पदवी झाले आहे.  अलिबाग येथे झालेल्या २९व्या किशोर राज्य अजिंक्यपद निवड चाचणी कबड्डी स्पर्धेत त्यांची कोल्हापूर संघात निवड झाली. या स्पर्धेत प्रथम क्रमांक पटकावून कोल्हापूर जिल्ह्याला विजेतेपद मिळवून दिले.  अहिल्यानगर येथे झालेल्या ७०व्या वरिष्ठ गट पुरुष राज्य अजिंक्यपद निवड चाचणी कबड्डी स्पर्धेत कोल्हापूर संघात निवड झाली होती. त्यानंतर ठाणे येथे ७२व्या वरिष्ठ गट पुरुष राज्याजिंक्यपद निवड चाचणी कबड्डी स्पर्धेत कोल्हापूर संघात निवड होवून झालेल्या स्पर्धेत प्रथम क्रमांक पटकावून कोल्हापूर जिल्ह्याला तब्बल २२ वर्षांनी विजेतेपद मिळवून देण्यासाठी सौरभ इंगळे याचे मोठे योगदान आहे.