Homeकला - क्रीडापीबीजी कोल्हापूर टस्कर्सची रायगड रॉयल्सवर मात

पीबीजी कोल्हापूर टस्कर्सची रायगड रॉयल्सवर मात

कोल्हापूर :
कर्णधार राहुल त्रिपाठी (नाबाद)ने केलेल्या सुरेख फलंदाजीसह आनंद ठेंगेने केलेल्या अचूक गोलंदाजीच्या जोरावर पीबीजी कोल्हापूर टस्कर्स संघाने रायगड रॉयल्स संघाचा २ गडी राखून पराभव करत दुसरा विजय मिळवला. राहुल त्रिपाठीला सामनावीर म्हणून गौरविण्यात आले.
महाराष्ट्र क्रिकेट संघटनेच्यावतीने आयोजित अदानी महाराष्ट्र प्रीमियर लीग (एमपीएल) २०२५ स्पर्धा गहुंजे येथील महाराष्ट्र क्रिकेट संघटनेच्या मैदानावर सुरू आहे. रविवारी झालेल्या सामन्यात पीबीजी कोल्हापूर टस्कर्स संघाने नाणेफेक जिंकून प्रथम गोलंदाजी करण्याचा निर्णय घेतला. पीबीजी कोल्हापूर टस्कर्सच्या आनंद ठेंगे (४-२९), दिपक डांगी (३-२७), आत्मन पोरे (२-३१) यांनी केलेल्या अचूक गोलंदाजीच्या जोरावर रायगड रॉयल्सचा डाव १९.४ षटकात सर्वबाद १५९ धावांवर संपुष्टात आला. विकी ओस्तवाल (२२) व सिद्धेश वीर (२१) यांनी २२ चेंडूत ३९ धावांची सलामी दिली. कोल्हापूरच्या आनंद ठेंगेने या सलामी जोडीला झेल बाद केले. नीरज जोशीने २७ चेंडूत १ चौकार व ५ षट्काराच्या मदतीने ४९ धावांची खेळी केली. त्याचे अर्धशतक एक धावेने हुकले. ओंकार खाटपे १६, हर्ष मोगावीरा १०, ऋषभ राठोड १० यांच्या धावा वगळता तळातील फलंदाज दुहेरी खेळी करू शकला नाही.
पीबीजी कोल्हापूर टस्कर्स संघाला विजयासाठी १६० धावांचे आव्हान होते. अंकित बावणे व सचिन धस या जोडीने २४ चेंडूत ४२ धावांची भागीदारी करून सुरेख सुरुवात करून दिली. सचिन धस २९ धावा, तर अंकित बावणे १५ धावा काढून बाद झाला. त्यानंतर सिद्धार्थ म्हात्रे (०)ला तनय संघवीने पायचीत बाद केले. चौथ्या क्रमांकावर फलंदाजीस उतरलेल्या कर्णधार राहुल त्रिपाठीने ४३ चेंडूत ५३ धावांची आक्रमक खेळी करून संघाच्या विजयात मोलाचा वाटा उचलला. त्यात त्याने ५ चौकार मारले. राहूल त्रिपाठी व विशांत मोरे (२२) यांनी सहाव्या विकेटसाठी ३० चेंडूत ४९ धावांची भागीदारी करून संघाला विजयाच्या जवळ नेऊन ठेवले. शेवटच्या ६ चेंडूत ६ धावांची आवश्यकता होती. पहिल्या चेंडूवर धनराज शिंदेने एक धाव घेतली. त्यानंतर तिसऱ्या चेंडूवर दोन धावा घेऊन हे आव्हान २ चेंडूत ३ धावा असे कमी केले. त्यानंतर शेवटच्या चेंडूवर अतिरिक्त धावा कोल्हापूर संघाला मिळाल्या व कोल्हापूर टस्कर्स संघाने हे आव्हान २० षटकात ८ बाद १६२ धावा करून पूर्ण केले.

RELATED ARTICLES
Mumbai
broken clouds
27.4 ° C
27.4 °
27.4 °
82 %
5.5kmh
84 %
Sat
27 °
Sun
27 °
Mon
27 °
Tue
27 °
Wed
27 °

Most Popular

You cannot copy content of this page