कोल्हापूर :
         महाराष्ट्र क्रिकेट संघटनेच्या वतीने आयोजित डब्लूएमपीएल स्पर्धेत ईश्वरी सावकार (७८धावा), ईश्वरी अवसरे (५२धावा) यांनी केलेल्या दमदार खेळीच्या जोरावर सोलापूर स्मॅशर्स संघाने रायगड रॉयल्स संघाचा ३० धावांनी पराभव केला. सोलापूर स्मॅशर्स संघाने गुणतालिकेत ४ विजय, १ पराभवसह दुसरे स्थान कायम राखत अंतिम फेरीत आपले स्थान निश्चित केले. सामनावीरचा बहूमान ईश्वरी सावकार हिला मिळाला.
          गहुंजे येथील महाराष्ट्र क्रिकेट संघटनेच्या मैदानावर सुरु असलेल्या स्पर्धेत साखळी फेरीत रायगड रॉयल्स संघाने नाणेफेक जिंकून प्रथम गोलंदाजी करण्याचा निर्णय घेतला. सोलापूर स्मॅशर्स संघाने प्रथम फलंदाजी करताना २० षटकात २ बाद १६९ धावांचे आव्हान उभे केले. ईश्वरी सावकार व ईश्वरी अवसरे यांनी ७६ चेंडूत ९६ धावांची सलामी देत संघाला भक्कम सुरुवात करून दिली. ईश्वरी सावकारने ५३ चेंडूत ७८ धावांची विक्रमी खेळी केली. याआधी ईश्वरी सावकाराने रत्नागिरी जेट्स विरुद्ध ७५ धावांची खेळी केली होती. तिला ईश्वरी अवसरेने ४४ चेंडूत ५२ धावांची आक्रमक खेळी करून साथ दिली. तिने ६ चौकार व २ उत्तुंग षटकार खेचले. ईश्वरी अवसरेला १३व्या षटकात आदिती गायकवाडने पायचीत बाद केले. त्यानंतर ईश्वरी सावकारने शाल्मली क्षत्रिय (नाबाद ३२)च्या साथीत दुसऱ्या विकेटसाठी ४३ चेंडूत ७० धावांची भागीदारी करून संघाला १६९ धावांचे आव्हान उभारुन दिले. रायगड रॉयल्सकडून प्रज्ञा वीरकर (१-२३), आदिती गायकवाड (१-२७) यांनी प्रत्येकी एक गडी बाद केला. विशेष म्हणजे या स्पर्धेत रायगडच्या जान्हवी वीरकरने दुसरे षटक निर्धाव टाकले.
       १६९ या आव्हानाचा पाठलाग करताना रायगड रॉयल्स संघाला २० षटकात ९ बाद १३९ धावापर्यंत मजल मारता आली. पॉवरप्लेमध्ये किरण नवगिरे (१८), भाविका आहिरे (१०), श्रावणी देसाई (२) हे बाद झाल्याने रायगड रॉयल्स ३ बाद ४३ धावा अशा स्थितीत होता. त्यानंतर आयेशा शेखने एकाबाजूने लढताना २५ चेंडूत २ चौकार व ३ षटकारासह ४१ धावांची खेळी केली. तिला प्रज्ञा वीरकरने १६ धावा काढून साथ दिली. या जोडीने २६ चेंडूत ३८ धावांची भागीदारी केली. सोलापूरच्या मुक्ता मगरेने आयेशा शेखला झेल बाद करून रायगड रॉयल्स अडचणीत टाकले. यशोदा घोगरे (१४), इशा पठारे (१३)ने थोडासा प्रतिकार केला. सोलापूर स्मॅशर्सकडून शरयू कुलकर्णी (२-२१), मुक्ता मगरे (१-६), गायत्री सुरवसे (१-१९), शाल्मली क्षत्रिय (१-१९) यांनी सुरेख गोलंदाजी केली.

कोल्हापूर :
          कोल्हापूर जिल्हा सहकारी दूध उत्पादक संघ (गोकुळ) चे नूतन चेअरमन  नविद मुश्रीफ व संचालक मंडळ यांनी  बुधवारी मुंबई येथील सह्याद्री अतिथिगृह येथे महाराष्ट्र राज्याचे उपमुख्यमंत्री एकनाथ शिंदे तसेच दुग्धविकास मंत्री अतुल सावे यांची सदिच्छा भेट घेतली. यावेळी गोकुळ परिवाराच्यावतीने उपमुख्यमंत्री एकनाथ शिंदे व दुग्ध विकासमंत्री अतुल सावे यांचा सत्कार करण्यात आला. यावेळी गोकुळ दूध संघाच्या विविध योजनांची व प्रलंबित विषयांची माहिती दिली.
        याप्रसंगी गोकुळ दूध संघाच्या ग्रामीण भागातील दूध उत्पादक शेतकऱ्यांच्या हितासाठी राबविण्यात येणारे विविध उपक्रम, सौरऊर्जा प्रकल्प, स्लरी प्रकल्प, वासरू संगोपन योजना, मुंबई, पुणे डेअरी विस्तार तसेच मुंबई येथील प्रलंबित भूखंडासंदर्भातील विषयांवर सविस्तर चर्चा झाली. तसेच यावेळी दुग्ध विकास मंत्री यांना गोकुळ भेटीचे निमंत्रण देण्यात आले.
       यावेळी उपमुख्यमंत्री एकनाथ शिंदे म्हणाले की, मुंबईसारख्या महानगरात गोकुळ दूध व दुग्धजन्य पदार्थांना ग्राहकांकडून चांगला प्रतिसाद मिळत आहे. गुणवत्तेच्या माध्यमातून गोकुळने नागरिकांच्या मनात विश्वास निर्माण केला असून हा विश्वास कायम राखून संस्था अधिक ग्राहकाभिमुख व्हावी आणि बाजारपेठेत आपले स्थान आणखी मजबूत करावे.
        दुग्धविकास मंत्री अतुल सावे यांनी आपली सांगितले की, दुग्ध व्यवसायाच्या विस्तारासाठी आवश्यक ते धोरणात्मक निर्णय घेण्यासाठी शासन कटिबद्ध आहे. गोकुळसारख्या नामांकित संस्थेला प्रलंबित विषयांवर शासनस्तरावर सर्वतोपरी सहकार्य करण्यात येईल.
        यावेळी महाराष्ट्र राज्याचे वैद्यकीय शिक्षण मंत्री हसन मुश्रीफ, आरोग्यमंत्री तथा कोल्हापूर पालकमंत्री प्रकाश आबिटकर, आमदार चंद्रदीप नरके, चेअरमन नविद मुश्रीफ, माजी चेअरमन विश्वास पाटील, संचालक अभिजित तायशेटे, अजित नरके, शशिकांत पाटील-चुयेकर, किसन चौगले, नंदकुमार ढेंगे, कर्णसिंह गायकवाड, सुजित मिणचेकर, अमरसिंह पाटील, अंबरिषसिंह घाटगे, बाळासो खाडे, युवराज पाटील, मुरलीधर जाधव, कार्यकारी संचालक डॉ. योगेश गोडबोले, वाशी शाखा डेअरी व्यवस्थापक दयानंद पाटील उपस्थित होते

कोल्हापूर :
         भविष्यातील कोल्हापूरची गरज ओळखुन सुरू केलेली ‘ललित गांधी इंटरनॅशनल स्कूल’ ही कोल्हापूरच्या शैक्षणिक विश्‍वातील नव्या अध्यायाची सुरूवात असेल असे प्रतिपादन महावीर एज्युकेशन सोसायटीचे अध्यक्ष ललित गांधी यांनी केले. संस्थेतर्फे मेट्रो लाईफ सिटी या अत्याधुनिक टाऊनशीपमध्ये उभारण्यात आलेल्या ‘ललित गांधी इंटरनॅशनल स्कूल’च्या शुभारंभप्रसंगी ते बोलत होते.
         याप्रसंगी संस्थेचे सचिव महेश सामंत, महावीर स्कूल (माध्यमिक)च्या मुख्याध्यापिका धनश्री व्हनागडे, ब्लॉसम प्ले स्कूलच्या मुख्याध्यापिका निलम जाधव, महावीर स्कूल (प्राथमिक)च्या मुख्याध्यापिका विद्या सरमळकर, नवीन शाळेच्या डायरेक्टर मुक्ती ओसवाल, सौ. जया गांधी, हर्षिता भंडारी, भक्ती कटारीया, अ‍ॅड. मेघ गांधी, सौ. अनिता गांधी आदी प्रमुख मान्यवरांच्या उपस्थितीत शुभारंभ सोहळा उत्साहात संपन्न झाला.
         ललित गांधी पुढे म्हणाले की, ३३ वर्षापूर्वी पहिली शाळा सुरू करताना सुसंस्कारासह दर्जेदार शिक्षण देण्याचे जे सेवाव्रत स्विकारले होते त्याच भावनेने आज सहावी शाळा सुरू करीत आहोत. ही शाळा इंटरनॅशनल स्कूल श्रेणीमध्ये सुरू करण्यामागची प्रेरणा इन्फोसिसचे संस्थापक नारायण मुर्ती आहेत. कोल्हापूरात आय.टी. क्षेत्रासह सर्वांगिण विकास अपेक्षित असेल तर अन्य सुविधांसह दर्जेदार शिक्षणाच्या सुविधा वाढविण्याची गरज त्यांनी व्यक्त केली होती. त्यांना अपेक्षित गुणवत्तेचा दर्जा, क्रीडा सुविधांसह परिपुर्ण अशी इंटरनॅशनल स्कूल बनविण्यासाठी आम्ही कटीबध्द आहोत अशी ग्वाही ललित गांधी यांनी याप्रसंगी दिली.
          सुसंस्कारासह गुणवत्तापुर्ण शिक्षणाबरोबरच, फुटबॉल, क्रिकेट, बास्केटबॉल, बॅडमिंटन, टेनिस आदी सर्व प्रकारच्या क्रीडा प्रशिक्षणाची सोय उपलब्ध केल्याचेही ललित गांधी यांनी सांगितले.
इंटरनॅशनल स्कूलच्या डायरेक्टर सौ. मुक्ती प्रशम ओसवाल यांनी स्वागत व आभार प्रदर्शन केले.